Gazte nintzela hasi nintzen hezkuntza ez formalaren bitartez haur eta nerabeekin hartu emanean. Herri aktibo batean bizitzeak, aukera eman zidan gai sozialen inguruko kontzientzia garatu eta ezinegona eragiten zidaten esparruetan eragiteko.

Testuinguru honetan hasi nintzen magisteritza ikasten, eta hezkuntzaz eta gizarte gaiez Euskal Herrian ikasitakoaz gain, atzerriko zenbait errealitate ezagutzeko aukera ere izan nuen.

Nire autoezagutza prozesuak sexualitatean sakontzera eraman ninduen, eta zenbait espaziotan partekatu nuen bide horretan ezagutu eta ikertutakoa.

Hezkuntzatik gaia lantzearen garrantziaz jabetuta, Heziketa Sexual eta Emozional ikasketak burutu nituen gradua amaitzean.  Jardun profesionalak norabide hori hartu zuen, eta Sexu Heziketa, Ongizate Emozional eta Tratu Onen inguruko formakuntza eta tailerrak ematen aritu izan naiz geroztik.

Helduekin lanketa hau egitearen beharra ikusita, haiengana zuzendu nahi izan dut proiektua nagusiki. Guraso, irakasle eta hezitzaileei kalitatezko Heziketa Sexual eta Emozionala egiteko baliabideak eskainiz,  haur eta nerabeen ongizatea zaindu eta indarkeria matxisten prebentzioa egitea da helburua.

Pertsonalki, argi ikusi dut ez nintzatekeela gaur naizen moduko pertsona eta profesionala izango etxetik hasi eta komunitateak ez balizkit garapen baldintza jakin batzuk eskaini.

Horregatik, komunitateari ekarpen hau egin nahi diot bueltan, ziklo horretan sinesten dudalako.